屋企加楼，记得係元旦嗰日去买家私嘅，我就搭地铁翻去滘口，我大佬开面包仔过去车我，然后一齐过去买家私~ 我哋係去盐步家具城嘅，哩个地方我就经常经过啦，不过未试过入过去，嗰次係我第一次入去呢，而我哋要去嘅店铺就係入口嗰度啫，就喺黄海路对面同埋广佛路边~对于家具我真係冇乜研究，不过我大佬之前做过室内设计嘅，佢应该认识会深啲，即係材料同埋价钱咁~ 其实一开始我觉得家私唔便咯，所以都冇乜底，但係当我睇到嗰啲价钱之后就唔觉得佢好贵嘞，当然我哋屋企就冇乜可能买啲贵嘢嘎啦，不过买哩用住先，加上家具城哩啲应该係会便过出面嗰啲专卖店嘅，我哋睇咗好多家私，毕竟我哋屋企係吉屋，所以sofa、床、电视柜、鞋柜、衣柜同埋床头柜哩啲都要买咯嘞，最后我哋决定要咗一套藤艺sofa，因为睇落去实正啲，虽然比嗰啲布艺sofa贵唔少，电视柜哩度款色都叫做可以啦，最后我哋都拣到心水咯嘞，床感觉都几抵下，先500蚊，係米半乘两米嘅，跟住买埋床垫，薄嗰种，380，感觉都可以啊，个衣柜我就几钟意，够大，款色亦都唔错，不过设计上出现失误，因为係推拉门，竟然设置咗3行，即係中间嗰行就比较难用嘞，算嘞，反正我够用就算嘞~我记得睇到差唔多12点终于决定要买啲咩嘞，然后嗌老世计数，当时嘅总价唔记得几钱嘞，然后我哋同佢讲价嗌佢便300，佢係都唔滞，最后係便咗200啫，然后嗌佢送几张嗰啲圆凳俾我哋，开始佢谂住送两张嘅，我哋话买咗咁多嘢送3张啦，佢最后讲唔过去就送3张嘞~哩间嘢俾我嘅感觉就係唔係算高档，但係佢嘅价钱我都觉得几好接受，或者佢质量唔係几好啩，有或者係我唔了解哩一行，反正都可以啦，如果以后仲有需要嘅话我谂会再嚟都唔定~